Acts 19

PoloꞋa Efesusi maineno Yoni kema nehaviya veaꞋmogamina Yisasi kea hamapai-maine.

1ApolosiꞋa Kolini mainegeno PoloꞋa agoꞋyalega hanea kumaꞋyagale vaiyatete huno Efesusi uvaꞋyi huno nagoꞋa Yisasina amakuꞋa amitafa humainaya veaꞋnea amake-maine. 2Amaketeno mage huno hamavike “Yisasife havitama tamakupi maletama tamametiti nehaya kanafina Alu Aotage Avamula ali-mainafi oꞋalinae?” huno hamavigegeꞋya “AꞋao, ‘Alu Aotage Avamula maine.’ huꞋya haya kea ohavinone.” huꞋya hae. 3Hageno PoloꞋa mage huno hamavige “HanaꞋa li falelamatenae?” huno hamavigegeꞋya mage hae “Yoni ti falelatenae.” huꞋya humainae. 4Hageno PoloꞋa mage huno hie “YoniꞋa mage nehuno tina falematene ‘Kefo yatamihena tamakuꞋa aiyahae hisageꞋna tina fale-lamategahue.’ huno nehuno veala mage huno hamapai-maine ‘Nagai nakavelaga esia kanomofe, havitama tamakupi maletama tametiti hiho.’ huno humaineana Yisasife huno humaineane.” 5Huno higeꞋya ani kea haviyanagino Efesusi veaꞋmogamina AnumayatimoꞋa Yisasi agile tina falematene. 6Fale-mateteno PoloꞋa ayana amanute malegeno Alu Aotage Avamula amakaite elavino egeꞋya amaku amakesafiti nohaviya kea, alu amake alu amake aiꞋya Anumayamo avayafiti hamapaiya kea hufalote humainae. 7Ani vayala tuelufuꞋa (12) vaya mainae.

8PoloꞋa tagufa (3) ikana Yuta veaꞋmogami mono nopi ute ete huno tokiyaꞋage kea huno Anumaya Koti kava yagaisia yafe amakuꞋa ali hetino hamapai-maine. 9Hamanepaiyanagi nagoꞋa vayaꞋmoꞋya amaku amakesa ailineleꞋya tokiyaꞋage ke huꞋya “Havige nehananagita tagupina ali omalegahune.” huꞋya mukiꞋa vea amaufi Yisasi kea hu-haviya hutageno PoloꞋa neꞋamataleno Yisasife haviꞋya amakupi malenaya veala amavaleno mukiꞋa kanafina efi efi huno Tilanusi humavenelia nopi mo huhaleno hamapai-maine. 10Tole kafu aniꞋa huno hamanepaigeꞋya mukiꞋa Esia mainaya veaꞋnea Yuta veaꞋnene Kaliki veaꞋnene Anumayamo kea havimainae.

Sekeva ne nafaꞋneyagamoꞋya kefo avamu anati-talegahe humainae.

11Anumaya KotiꞋa Polo ayapi tokiya avame yana humaine. 12NehigeꞋya veaꞋmoꞋya akasipiene kenaene Polo augafale akasaseteꞋya kali vayate aliꞋya vageno kaliꞋamimoꞋa kanale humategeno amakusafiti Kefo AvamuꞋyaga hati-laviꞋya umainae. 13NagoꞋa Yuta vayaꞋmoꞋya Kefo Avamula veaꞋmogami amakusafinagati amanati neꞋatalaya vayaꞋmoꞋya Kefo Avamula amakusafima mainea veate Yisasi agi neꞋayeꞋya mage huꞋya humainae “PoloꞋma tahanepaiya kanoa, Yisasi, agile Kefo AvamuꞋmoga amakusafinagatila hati-lavika evuo huꞋna kahanepauve.” huꞋya humainae. 14Ani kavaꞋma nehaya vayala seveniꞋa (7) ne nafaꞋneyaga ala mono nopi kava yagai-mainea kanomo nafaꞋneyaga Sikeva nafaꞋneyagamoꞋya ani kavala humainae. 15Nago yupa ani kava nehageno Kefo AvamuꞋmoꞋa mage huno kenonaꞋamia humaine “Yisasina ago ageteꞋna Polona age-mainogi tamakaya tagatamae?” huno humaine. 16Higeno Kefo AvamuꞋma agusafinaga mainea kanomoꞋa ani seveniꞋa (7) vayaꞋmogamite haiteno asaga hunelavino amakaseno nehamaeno amaugafa tusiya huno alihaviya humateteno kenaꞋamiene ali hatata hutalegeꞋya amaugafa alapaꞋage ani nopitila hati-laviꞋya falemainae. 17Mani kea Efesusi mainaya veala Yuta veaꞋnene Kaliki veaꞋnene haviteꞋya koli nehuꞋya Anumayatimona Yisasi agia tusiya huꞋya alisaga humainae. 18HageꞋya kasagoꞋyamoꞋya Yisasifena haviꞋya amakupi maleꞋya amametiti nehuꞋya kefo kavaꞋma haya kavafena hufalote humainae. 19Hufalote huteꞋya sesefe yaꞋamiene tusa huneꞋamataya yaꞋamiene analisa yaꞋamiene ani yaꞋyagahema kae-malenaya avoꞋyaga mukiꞋa vea amaufi atafi kaesagali-talenae. Kae-mainaya avoma miya humainaya monema hapaliyana fifiti tauseniꞋa (50,000) kina hapali-mainae. 20Anima tokiyaꞋage kavaꞋma humainea kavafena mukiꞋa kotega mo hamanepaiꞋya Anumayamofena haviꞋya amakupi malageno tokiyaꞋage humaine.

Efesusi veaꞋmoꞋya Polona haesaya ke humainae.

21Ani yaꞋyagamoꞋa haꞋno hutegeno Alu Aotage AvamuꞋmoꞋa Polona visia agu agesa amigeno mage huno hie “Masetonia umaigeꞋna Akaiya eteꞋna Yelusalemu uvaꞋyi hisuaꞋamoꞋna Lomu visua nagesa nehavue.” huno humaine. 22Huteno tole haꞋnemayaꞋa kanolatana TimotiꞋene ElasatusiꞋene hunategeꞋana Masetonia vaꞋageno PoloꞋa agaiꞋage anile nagoꞋene Esia kotega maine.

23Ani kanafina Yisasi kea nohaviya veaꞋmoꞋya Yisasi akave nemalaya kehena tusiya huꞋya hetiꞋya ke vaiꞋya amakoꞋya ke humainae. 24Ani kotega vayaꞋmoꞋya yafateti nago akefa amayateti talo huꞋya “Anumayati maine.” huteꞋya agia AtemisiꞋe huꞋya nehae. HuꞋya hageno nago kanomo agia TemitiliusiꞋe efe mone atafi kaeteno ani moneleti ani akefamo agima alisaga nehaya nona, osi osi nona talo higeꞋya veaꞋmoꞋya miya hageꞋya taloma nehaya vayaꞋmoꞋya tusiꞋa mone neꞋaliyane. 25NeꞋaliyanagino TemitiliusiꞋa mukiꞋa agaiꞋa aliꞋya vayaꞋene mukiꞋa osi osi Atemisina nomaꞋa taloma nehaya vayaꞋene ke higeꞋya melitalu hageno mage huno hama-paiye “Vemogatama tamakaya havimainae ani aliꞋyateti kanale monetia neꞋalune. 26NeꞋalunanagi ani kanoa, PoloꞋe, mukiꞋa Efesusi nemaiya veaꞋnene mukiꞋa Esia kotega nemaiya veaꞋnenefe ‘Amayateti taloma haya anumaya afa yatafa hanegi Anumaya omainae.’ huno higeꞋya mukiꞋa veaꞋmoꞋya ‘Tamage nehane.’ huꞋya akave malaya kea ago havitama age-mainae. 27PoloꞋma hia kemoꞋa tagai aliꞋyatimo agia alino haviya havaya hutegeꞋya Esia nemaiya veaꞋnene alu mopalega veaꞋnene agima alisaga nehaya Atemisina atalesageno lavisigeꞋya veaꞋmoꞋya ‘Anumayati maine.’ huꞋya agia alisaga ohisageno Atemisi agima alisaga nehaya nofena ‘Afa yatafa hane.’ huꞋya hugahae.” huno humaine.

28HigeꞋya alitalu humainaya veaꞋmoꞋya ani kea havigeno amaipamoꞋa tusiya huno ata legeꞋya mage huꞋya hae “AtemisiꞋa Efesusi mainona vayaꞋmogatina tusiꞋa ala anumayati maine.” huꞋya humainae. 29HageꞋya mukiꞋa ani kumate veaꞋmoꞋya ala kenake nehuꞋya PoloꞋenema vaiyatete nehaꞋa kanolatana tolea Masetoniati kanolatane KaiyusiꞋene AlisatakusiꞋene anavayu huꞋya alitaluma nehaya kumapi anavaleꞋya amaiyayeꞋya umainae. 30Vageno PoloꞋa “AmuꞋnoꞋamifi kaiyeke mo hisue.” huno hianagi afuꞋaganaꞋya “OꞋugane.” huꞋya atafa humainae. 31Atafa hageꞋya nagoꞋa Polona kanapaꞋamoꞋya ani Esia kumate Lomu kava vayaꞋmoꞋya aniꞋa huꞋya agaitega kea atalageno egeꞋya mage huꞋya tokiyaꞋage kea hae “Kagaya veaꞋma alitalu haya kumapina oꞋvuo.” huꞋya humainae. 32HageꞋya alitalu humainaya veaꞋmoꞋya amaku amakesamoꞋa yagalegeꞋya nagoꞋa veaꞋmoꞋya nago kea hageꞋya nagoꞋa veaꞋmoꞋya alu kea hageꞋya tusiya huꞋya ala kenakea hageꞋya kasagoꞋya veaꞋnema alitalu humainaya yamona aepaꞋa ohavinae. 33OhavigeꞋya nagoꞋa Yuta veaꞋmoꞋya “Mage huka huo.” huꞋya Alekasatana ayetufageno amuꞋnoꞋamifi mo hetino ani kemo aepaꞋa hamapaigahe “AfaꞋa maiho.” huno ayana aligosi-gosi humaine. 34Aligosi-gosi hianagi Yuta kanoma mainea yafe agelama huteꞋya nagoke amavayage ailalupeꞋya mage hae “AtemisiꞋa Efesusi mainona vayaꞋmogatina tusiꞋa ala anumayati maine.” huꞋyama maiꞋya hayana tole yagemo kanafi ani keꞋageꞋyana maiꞋya humainae.

35Nehageno haenagaꞋa ani kumate avo kae aliꞋyate kanomoꞋa alitalu humainaya vayaꞋmogamina ali hakaꞋyufeno mage hie “Efesusi vayaꞋmogatama Atemisina anumayatimo agima alisaga nehaya nona Efesusi kumateꞋma kanaleꞋya huno kava neꞋyagaiya yafena hana veaꞋmoꞋya ohavinae? Ikapinagati elavi-mainea yafana nagaluma humalenaya yafafena kanaleꞋya huta kava yagai-mainonagi hana veaꞋmoꞋya ohavinae? MukiꞋamoꞋya ago havimainae. 36HavimainayanagiꞋya mani kea hefala okigahagi tamakaya afaꞋa maiho. Nagola aifoꞋnafo kavala ohiho. 37Anavaletama aya kanolatamogania Atemisi agima alisaga nehuna nopitila nagaluma humalenona yana musufa yana ohunaꞋe. Tagaiti anumayatimona Atemisife huhaviyana hu-oꞋatenaꞋe. 38Ala kaiyeke havisia kanomoꞋa nagoꞋa kanafi kaiyeke havi nopi maineno kaiyekea havigahigi TimitiliasiꞋene agaiꞋene aliꞋya neꞋaliya vayaꞋmoꞋya ‘Kema hane.’ hinuꞋyahena ani kanomote visae. 39Ugahagi alu yafema hinutamahena kamani vayaꞋmoꞋyama alitalu hisagetamahena ani kea fatago hiho. 40Ma yagefima hu-mainona yafena kamani vayaꞋmoꞋya ‘Tu nehae.’ huꞋya tahavigesagetahena hana kanomo hetino anima keha keha nehaya yamona aepaꞋa hamapaigahie?” huno humaine. 41Avo kae aliꞋyate kanomoꞋa mani kea huteno “Notamilega ataletama viho.” huno hemanatigeꞋya umainae.